Philip A. Rademaker

Mucha, bo ta mira
e hendenan ei ta pasa?
Mira nan awé
pa mañan bo konosé nan.
Anto e bosnan suak ei
ku fo’i djaleu ta zona,
un dia lo bo sa
ku t’abo nan ta’a yama.

Lo bo rekonosé
e hanchinan smalitu
ku b’a kore krese
bai laga sin ni sinti,
tronkon dje palu
k’a yeg’i ‘na bo sombra,
i e muhé kansá ei,
k’un tempu a kria bo.

Mira e laman
ku no por bandoná bo.
Fula e baranka
lag’e siña bo karga.
Sinti kon tur dia
ku solo su kayente
bo rais t’ei bora
mas hundu den su alma.

---

Rademaker, Philip A. (Fifi). Bos di buriku. Ed. rev ed., Fundashon Planifikashon di Idioma (FPI), 2008.