by Richenel Ansano

asina bo logra gana kabes
di e suela-baranka kròbòkròbò
i bo wowo kustumbrá
ku e shelu i laman grandi mahestuoso
un brio silensioso ta kumindá bo bista
un tapeit bentá riba suela
tur aki aya
ku diseño seku
parti na mil i un pida
skuma blanku seku
ta sosegá den bòm di un ke otro buraku
punta skèrpi di suela-baranka
ta mustra kristal bon balansá
yerba di laman i bembe
ta skonde filigrana bo'i nan brasa
mientras wiriwiri di strea
ta bula furioso
riba e pidasitu tera ku nan por haña 
kambia su maron-hel dòf
hasié un bèrdè lila blou kòrá oraño hel
ku ta hasi kenshi den bo wowo
blèndu bo den bo kaná
ponebu kore kabé'i gai
miéntras bo ta sinti bo kabes ta reis
anto bo ta sigui kore kabé'i gai
te ora bo ripará
ku bo pianan ta liña pa punt'e baranka
i bo oreanan ta skucha un kanto sin zonido
di bokanan pintá na mil koló
di mil bes mil djamanta
boka den tera
boka djesnan k'a keda tera
esnan k'a kome salu
promé nan bai drumi den tera
ora salu kurti nan hala
kòrta nan buelo
shete boka tur na salu
a keda atras
spiritu di un tera sin palabra
ku ta kanta sin zonido 
pero ku un ritmo konosí 
ritmo di bo kurason
pasobra pará riba fundeshi di baranka 
salu a kurti bo tambe su kueru 
preservábu pa mil bes mil aña mas 
anto por fin bo kareda di kabé'i gai
ta pone ku bo pia ta lanta stòf 
ora skuma kita fo'i bo mente 
ata kareda a kaba awó
ironia den ironia
zumbi kòrtadó di ala
a krusa laman nòrt
kurti bo stoma ku kristal di laman
pa bo keda mará na tera
ku e ta konsiderá di dje
ma awor tera mes a kuminsá saludá
tuma palabra di tur esnan
ku a bona su shirishiri
tur esnan k'a kore mesun kareda ku bo
i tera ta kanta na shete boka

---

Ansano, Richenel. Kolosenshi. Alima, 2010.