Philip A. Rademaker

Mi sa kana ronda mondi
leu tra’i lomb’i Dios ayá,
purba konta kuantu blachi
lo a kai for dje kaská,
kuantu bientu e datu largu
por a para soportá,
kuantu tem’ tin k’e baranka
a bai lèn p’e sosegá.

Mi sa sinta kant’i awa
skuch’e olanan su sla,
pensa, ku garná di kosta
kuantu santu nan lo n’ tra’,
kuantu añ’ bia kuantu dia
nan lo tin ta belenkia,
kuantu kriatur’i Tata
nan lo n’ kria, sustentá.

Mi t’ei kana leu fo’i hende
pa mi sa kiko hende ta.
Pa mi ansha haña kalma,
pa mi alma relahá,
pa mi orguyo baha fria
i trankil mi realisá
ku den Tata su universo
ni un pipit’i greis mi n’ ta.

---

Rademaker, Philip A. (Fifi). Bos di buriku. Ed. rev ed., Fundashon Planifikashon di Idioma (FPI), 2008.