Philip A. Rademaker

Mi ta drumí aki bou
ta mira mi yunan krese.
Flor orguyoso ku ta saka kabes
riba yerba di malu.

Nan koló ta bria,
ma ya ningun no ta kòrda
ku nan suela t’e mortaha
den kua mi ta lorá.

Bichi di bida
ta koba pasashi
den wesu bieu
habri buraku
pa áwaseru pasa.
I solo ku sí sa,
ta manda kayente
pa yuda rais di mi yunan
rèk yega na mi.

Nan simia tin ku kai
bora drent’e ter’akí
kaminda mi ta drumí
ketu bai ta warda
sin ningun otro deseo
ku di fertilisá pa nan pari.

Mi ta drumí aki bou
ta warda mi yunan krese.

---

Rademaker, Philip A. (Fifi). Bos di buriku. Ed. rev ed., Fundashon Planifikashon di Idioma (FPI), 2008.