Luis Daal

Bistí únikamente ku un lantera 
delegá i transparente
ku meste mustra mi sunú
mas limpi i onesto, sin ripara,
lo mi ke emprende mi bja'a 
ku solo su rigor klabá
den plenchi grandi di mi frenta…

I, pia-abòw ankrá den dèk,
mi lomba ku su koncha bjew
ku experensha 'i áñanan a forma,
mi wówonan radiante 'i goso
i namorá di e rumbo ku m'a skohe.

Ku rabja di mi hámbr bjew 
kalmá, na flòw i lotriná;
i ku mi mannan firme na timón
di barku grandi di mi sedu
ku awó ta nabegá lamán
sin deseá su awa ni su fondo;
ku bela di mi fe hinchá pa Bjentu,
librá di odio i di envidia skur !

Asina ej mi ta baj lamán
sin para puntra kiko tur esnán
ku keda atrás, na tera o ankrá
den haf sigur di nan rikesa, 
di nan postín o di nan frustashón
ta pensa o lo pensa di mi…

---

Daal, Luis. No ora oradu / Te Juister Stonde. Flamboyant/P, 1976.