Philip A. Rademaker

pa kanta djaleu

Teresita di Otrobanda,
Tere, yu di Yemanyá,
Teresa solitu, kansa ‘i karga mundu,
Teresa ku bida a bandoná,

Bo shimis di sufrimentu
ku b’a tòrnu, renobá,
awor t’e trahe mahestuoso
di un pena madurá.

Hende bibu n’ por stima bo.
Nos amor n’ ta alkansá.
Ta diosnan so por supla lanta
chisp’ i bo karbon tapá.

Ku nan so lo bo lanta balia.
Pa nan bo barika lo retosá.
I ami lo para djaleu mira bo
den bo mundu di orichá.

Djaleu lo mi deseá bo lepnan
ku koló ‘i pashon pintá,
djaleu, hole kané ‘i bo kueru
ku aw’i rosmarein bañá,

sinti bo kurpa, un paisahe
ku seru i vaye pa eksplorá,
djaleu mira bo lanta para
pika tambú den bo kaná.

Djaleu lo mi soña, Teresa di otro.
Djaleu lo mi keda anhelá,
te ora bo nòmber su miel na mi boka
mi soño sin suèltu por bin konsolá.

---

Rademaker, Philip A. (Fifi). Bos di buriku. Ed. rev ed., Fundashon Planifikashon di Idioma (FPI), 2008.