Lucille Berry-Haseth

Karkas di un kas 
riba e playa bandoná, 
testigu muda di pasado, 
ke konta istoria
di pirata, makuaku, 
flamingo, meuchi i snepi,
selashi di piská i di hende, 
sin por haña oido
pa su kanto doloroso.

Mas paden riba e isla pober,
baranka so,
kurtí pa awa, salu, solo i bientu,
dos tres kabritu purfiá
ta púluwe pa sigui biba
i un faro solitario ta atvertí
ku aki tin trankilidat
pa plakia ansha
di mundu su kareda.

Tin hende ta bin atmirá, 
otro sin keber
ta laga un playa deskuidá, 
proba nan falta di heful 
i kousa duele na esnan 
ku ke apresiá naturalesa 
sin mancha ku no ta di tempu.

Un ñaрa, baranka plat 
i tantu mia leu di isla mama,
ta warda man di piedat 
bin yuda mantené 
e kreashon original 
ku pa kapricho natural 
ta Kòrsou su herensia.

---

Berry-Haseth, Lucille. Resonansia. 2nd ed., Willemstad, Fundashon pa  Planifikashon di Idioma (FPI), 2013.