Philip A. Rademaker

Laman mainta tempran,
kurpa inmenso i floho
ta hala rosea sosegá
sin sinti solo sende.

Laman k’a pèrdè ariba,
kurpa sukú drumí sunú
ta warda pida pida lus
bin tent’é ku karisia.

Djis ei su soño pisá,
kishiki pa rayo pompadó,
t’ei spat chispa, evaporá,
lag’é sprinchi i transparente,

pa shelu drei plama koló
meskla den su awa kla,
sprengu e ku hoya blou
i finfin’i djamanta.

E ta rel rèk, retosá,
pone kam’i kosta keha,
kaba span tur su grandesa,
relahá p’e reflehá

---

Rademaker, Philip A. (Fifi). Bos di buriku. Ed. rev ed., Fundashon Planifikashon di Idioma (FPI), 2008.