by Richenel Ansano

m'a tendebu yora ket 'asina den bo soño
m'a sinti sala di bo kurason yena
di bishita ku a kana bin
bin pasa algun dia
bin pasa dia
pasa dia
numa ku nan a lubidá di bai kas bèk despues di fiesta den bo alma
despues ku nan pia a kue tera nan a bira poko prufiá, prufiá di mas
anto abo
a keda ketu
pa falta di un orea
un orea amigu ku b'a kere
simplemente no por ta eksisti
o si e t'ei mes, lo no ta pa abo

awor ku bo sa ku mi sa 
bo por laga bai numa
drenta mi brasa awor 
mi por karisiá guera 
saka foi bo kurason 
o kisas asta bras'é, 
poné spanta bai 
si bo djis lèn na 
mi pechu 
drumi den
mi brasa 
si bo ke 
aworaki
mes
si

mester tin maske ta un hende ku bo por konfia bo doló.

---

Ansano, Richenel. Kolosenshi. Alima, 2010.