Ini Statia

Manera laman di áwaseru
mi yoramentu ta bira basha,
laba kara, freska tera.

I mientras simia di kustumber
ta buska rais pa tene wanta,
den mi ta susurá:
Ta palu grandi ta kai asina?

Mi yoramentu ta rebibá
kurpa blousá di pasado,
manchá ku sanger di karbachi.

I miéntras sodó ku aw’i wowo
ta spula saliña ku salpeter,
den mi ta susurá:
Ta set di doló mester a sasia?

Manera kandela di volkan
mi yoramentu ta eksplotá,
lastrando baranka den kaminda.

I mientras lava ta sigui kushi,
skupi furia ku shinishi,
den mi ta susurá:
Ta bista skur ta klara asina?

Mi yoramentu no ke distinguí
maltrato for di karisia,
ni tristesa for di euforia.

Ta djis e ke pidi bientu
pa e supla su aliento
di spiritu universal
den e saber di rosea nobo.


I den mi ketu bai ta susurá
ku e siklo akí lo no terminá,
tanten mi no realisá
ta ken di bèrdat ami ta.

Statia, Ini. Na Nòmber di Amor = In Naam der Liefde = In the Name of Love. In de Knipscheer, 2022.