Gibi Bacilio

Dak ta lèk
Plafòn ta bini abou
Linoleo ta kambia bira tera 
Muraya ta sker

Keda ketu
No bisa nada
Murmurá

Roi ta yena te basha afó 
Shushi ta yanga drenta kaya 
Stòf ta supla drenta olfato 
Lodo ta pusha drenta kas

Keda ketu
No papia nada
Murmurá, murmurá…

Awaseru ta basha bini abou
Welek ta kòrta palu, mata, pal'i lus
Bos a rementá glas i ko'i kibra
Bientu a pone zim di dak bira sinfonia di man

Keda ketu ketu
Sigui murmurá

Boka hanchu habrí
ta roga pa pida pan
Barika ta gruña
Wesu ta pèrta bin pafó

Keda ketu 
No bisa nada
Murmurá... murmurá



Kamber di oksígeno ta dekaí 
Rosea ta hala anshá
Bentana ku porta duru será
Airu ta pèstá

Keda ketu ketu
No hasi nada
Sigui murmurá ketu bai

Ader ta sera
Sanger ta kuaha
Oksígeno ta mengua

Keda ketu
No bisa nada
Murmurá

Boka duru será
Lepnan kosé na otro
Kakumbèin a pèrdè skarnir
Lenga a bòltu pèrdè tras di korokoro

Keda ketu ketu
Ni sikiera murmurá

Ainda bo boka ta será?
Bo lepnan no ta lòs for di otro? 
Ainda bo djentenan ta wantá?
Bo skarnir di kakumbèin ta frusá?


Zeta bo kakumbèin 
Sker bo lepnan fo'i otro 
Zeta bo kakumbèin
Kared'i djente laga ohochi bai 
Zeta bo kakumbèin
Lenga lora bin dilanti
Raspa bo garganta kongestioná
Hala un rosea grandi
Pusha vokal manda pafó
Primi konsonante manda na laira
Yena atmósfera ku lèter, palabra, frase
Palabra bira karni
Laga karni bibu 
kibra silensio
Bisa na bos haltu:
'Ata kambio
Ata buelta
Ata pa bo gosa.'

---

Bacilio, Gibi. Kueru marká. Willemstad, Carilexis, 2000.