by Richenel Ansano

ta manera kos ku solo a kansa
di tende dia’den dia’fó
tantu palabra di ingratitut
parse el a kansa
di karga nòmber di ta kriminal
nubianan a hala sera
Kòrsou a bira pretu pretu
den haltu aya
welek a pasa di pariba bai pabou
sker shelu na dos
anto awa a kuminsá basha
awa a basha
awa a sigui basha stret sin ke lèn
Kòrsou bèrdè bou di awa
kamindanan destruí
kloaka ta gumitá
dak ta pasa awa
telefòn ta kai afó
muraya ta basha ‘den
shelu ta sigui pretu
anto pueblo ta yama mandatarionan kriminal
kuminsá un siklo nobo
di yobida

---

Ansano, Richenel. Kolosenshi. Alima, 2010.