Luis Daal

Ni e kachonan no ta jora mas 
den anochi manera antes; 
nan no ta jena mardugá 
ku gritu di nan flambew
ku ta paga kabitu 'i bela 
di kantamentu 'i gaj, 
mjentras ku bjentu su peña 
grandi ta kore loko
den kabéj di pálunan 
kargå ku flor.

Flor di bo sunchi
a habri un jaga di goso
riba mi kara na kandela …

Lenga largu di un kaminda
mashá largu, ta drumi
ku tur su largu di kurpa
mi dilanti

Solo ta tota pánchinan
riba dak
ku ja a haña
un koló di ruku kimá kaba.

Doló fresku, doló nobo
ta meskla
ku mi keha bjew i skondí; 
ansha'koló di kokolo 'i funchi
ta pasa manera sombra den 
mi kara.

Baránkanan tá tristu
i awa 'i wowo di lamán 
ta baña e mil ponchéranan
di nan kara-di-bruwera-loko.
Turtuka,
esta tristu no,
ku nunka
bo n' tábatin mama
pa kwidabu...

---

Daal, Luis. No ora oradu / Te Juister Stonde. Flamboyant/P, 1976.