Philip A. Rademaker

Marka di nos kurpa den tera moli di hòfi
ku djis ei lagadishi loko di olvido
lo pasa plama laga
pagá,

Sodó ku ta para fria riba kueru kayente di pashon i pelea
k’a ras mané kandel’i mondi
ma ku ya
a dominá,

Salu di lágrima lou na mi boka marga
ku mi ta spula ku beter brutu puru
pa laba limpia
lubidá,

Potrèt pretu ku blanku pa keda kòrda kuerdo
tur e bianan ku awor sí desesperadamente
m’a bolbe namorá.

---

Rademaker, Philip A. (Fifi). Bos di buriku. Ed. rev ed., Fundashon Planifikashon di Idioma (FPI), 2008.