Lucille Berry-Haseth

Ora realidat manda bo 
un shete di baster,
bo ta spièrta, ripará
ku maske den laman di bida
no ta fásil sambuyá,
bo tin di sera wowo, riska
ku tur vigor ku a sobra bo.

Den e soño
ku kada be sa ripití,
bo ta lanta buelo, balansá 
bolbe kai bai fòndu,
pa den ansha di morto
bo purifiká, bolbe kue rosea
bira hende nobo.

---

Berry-Haseth, Lucille. Resonansia. 2nd ed., Willemstad, Fundashon pa  Planifikashon di Idioma (FPI), 2013.