Gibi Bacilio
Shinshon, Shinshon, Playa di Shinshon
Playa di Shinshon, zoya, zoya bai
Zoya bai riba ritmo di solo di Karibe
riba ritmo di bientu di Karibe
riba kadans di awanan di Karibe
Oh, Shinshon, Shinshon
Playa di Shinshon
Playa di Shinshon
Kreá pa wega di laman
Kreá pa wega di solo i luna
Kreá pa wega di bientu i tera
Prokreá pa wega di hòmber i muhé
Shinshon, Shinshon, Playa di Shinshon
Playa di Shinshon
kobá den kustia di Mama Kòrsou
Zoya, zoya bai
Zoya bai
riba ritmo di hòmber i muhé
riba ritmo di hende
Hende su hamber inpasiente
Hende su set insasiabel
Hende su merkado, su ganashi
Hende su komèrsio, su abundansha
su egoismo
Zoya riba ritmo di hende su maneho
su obra manual, su obra mental
su porkeria!
Ai, zoya, zoya bai, Playa di Shinshon
Playa di Shinshon, guli
guli riba kadans di dansa karibeño
un, dos, tres, kuater bòter
bòter di piedra, bòter di plèstik
plèstik machiká den bo stoma di laman
plèstik machiká den bo stoma di santu i piedra
plèstik indigestibel den bo stoma di awa salu
Ai, guli, guli
guli manda abou
Shinshon, Shinshon, Playa di Shinshon
Habri brasa pa
10, 100, 1.000, 100.000
bleki, bòter, karton, plèstik
plèstik di kèchup, plèstik di mayonès
plèstik di keshi, wòrs, mòrtadèl
Ai, guli, guli guli
manda abou
Shinshon, Shinshon
Playa di Shinshon
Pròp, pròp
pròp den bo stoma di laman
nos merkansia, nos ekonomia
nos amor patriótiko
Playa di Shinshon
Habri bo boka
Span bo boka di awa salu
Ata, tuma, bòter di puiri, bòter di plèstik
Prop, pròp den bo stoma
klòròks, vem, painsòl
sweft, swaft, swuft
shèltòks, kòtòks, plagatoks
plagashèl, plagatoks
Ata, ata!
Playa di Shinshon ta tembla
Playa di Shinshon ta respu
ta skupi, ta grita, ta arohá
Mira hende!
Mira hende ta kore bini
Fo'i tur parti nan ta kore bini
Señor Politiko ta kore bin riba su kanapé
karga pa kuater amtenar
Shon Pastó tambe ta ranka bin
den su stul di pordoná piká
lastrá pa kuater sirbidó di misa mashá djispou
Ata Señora Hustisia, un wowo so tapá
riba su trono di alabaster
wantá pa un ehérsito di abogado
i un emblema radiante di un famoso kas komersial
Mister Komersio i Misses Industria tambe t'ei
Nan a kore bin sintá riba puf árabe di kueru di kamel
kargá pa un kolonia di obrero, sin sapatu
paña di kaki steif striká
kamisa te na korokoro mará
Trahadó Sosial
bou di brasa robes un kaha di batata
i bou di brasa drechi un kusinchi moli, nèchi bòrdá
ta tumba bin pa mira Shinshon
Mener di Skol a kore bini
Yùfrou di Skol a kore bini
Den un man un zuip i un chupon
den e otro man un Paolo Freire
Mama i tata a kore sali fo'i nan kas
ku kaha di batata, kaha di wiski
ku stul di zoya i sèt di muebel oropeo
I nan tras...
un kareda largu
un kareda largu di mucha
ku dede den boka
ku wowo grandi habrí
Nan ta konta riba dede
Nan ta konta riba repchi
Nan ta kanta na bos haltu
'Shinshon, Shinshon, Playa di Shinshon
Shinshon, Shinshon, tene duru Shinshon.' (bis)
Tur hende a kore bin
pa sinta mira destino di Shinshon
'Shinshon, Shinshon
Ai Dios e pober.'
Shinshon ta respu i saka ketu bai
E ta bringa kontra su mes brasanan di laman
E ta purba dominá su stoma ku ta wal
Shinshon ta yora, ta sklama, ta grita
ta hisa kaha, bleki i plestik benta riba hende
sintá riba stul, kaha di batata, puf i trono
Ata tur na gritamentu
Ata tur ta yora
'Sigui Shinshon
Bringa Shinshon
Kurashi Shinshon
Wanta duru Shinshon
Pober Shinshon.'
Shinshon ta pèrdè forsa
ta bòltu drenta sali fo'i su mes boka
fo'i su mes stoma molestiá
Shinshon ta hèilu,
Shinshon ta stek
Tur hende a bira histériko
ta grita, ta yora, ta sker nan paña
Nan a laga awa salu sali lora yega te serka Shinshon
komo último tributo
na un ser tan kerí
Despues nan ta lanta para
kue nan kos di sinta ariba
bira lomba pa Shinshon
defuntu Shinshon
kue kaminda pa kas
Kaminda pa kas
nan ta bira mira otro
drei mira Shinshon
murmurá
Es ku Dios ke
Es ku Dios ke
Es ku Dios ke?
Es ku hende ke!
Bacilio, Gibi. Kueru marká. Willemstad, Carilexis, 2000.