Philip A. Rademaker

Mi konosé soledat. 
M'a bai bib'ayá
pa laba mi memoria 
den su riu di olvido, 
pa trose mi alma seka 
pa su kalor kurtié, 
pa duele para bira 
palabra ku papel.

M'a konosé soledat 
tem' ku m'a bib'ayá. 
T'un tera sin ayera, 
kaminda n' tin mañan, 
k'un lenga sin palabra 
i un shelu ku n' tin lus, 
ku kaya yen di hende 
ku n' sa ta ken nan ta. 
Anochi n' tin sosiegu, 
di dia n' tin trabou,
pa pena n' tin konsuelo
ni kura pa doló.

E awa di olvido
n' ta'tin e ayá,
ni e solo ku l'a kurti
mi alma desolá.

M'a bib'ayá mi so
meimei djesnan rònt di mi, 
sin nos por a splika
kon bini nos ayá.

Mi konosé soledat. 
M'a yeg'i bib' ayá.
I maske tempu a pasa, 
kon ta hasi lubidá.

---

Rademaker, Philip A. (Fifi). Bos di buriku. Ed. rev ed., Fundashon Planifikashon di Idioma (FPI), 2008.