Frank Martinus Arion

Asina nan ta ward’é
Eyu ku bai Hulanda
Nan ta ward’é na misa
Nan ta ward’é na mesa
Nan ta ward’é na kas.


1

Klòknan di misa tin un man
di bati
habri mainta grandi fo’i otro.
Awa a kai
seru i tera ta bèrde-bèrde.

Ta tempu di misa di ourora.
Anglonan hel
ta kompañabu te na misa —

kaminda muhénan
ta habri sayanan hanchu —
skèrpentina
pa dios yu bin baha ‘riba.

Un kareda di mucha muhé
bòki-bòki
ta kanta gloria
ta duna tur sorto di lus
ku nan bistí —

Ta bruha su sintí a bruha
k’el a lubida kamind’e misa
k’el a lubida kamind’e kas?

2

Batata!
Su kara a bira rondó
Di batata—
Ma e tin gan’e
Bisa un hende na papiamentu
Kon e stima funchi

Friu no ta hasi nada
Ma si bo kanta duru si
Na Hulanda
Nan ta kohebu sera-
I mi ke ku bo mesté di pèrmit
Na Hulanda
Hasta pa bo muri

No purba bai laman tampoko
Pa bo skapa
Pasobra e awa ta shushi
I tin bestia fis den santu
Ta wardabo sunchi—
Pa drenta bo boka

Kon ku bai bini
Na Hulanda strañeru bo ta keda—

Si nan konfiabu nan n’ ta konfiabu
Kompletu
Si nan stimabu nan n’ ta stimabu
Kompletu



3

Ma ora solo ku luna lagabu pasa
bini bèk bo tera – bo n’ skapa:
B’a bira mitar hende mitar strañeru
Un di bo wowonan ta mira funchi
i e otro ta mira batata- ma
niun di nan dos bo n’ gusta.

Den anochi bo ta soña, spanta,
spièrta, kere ta den sneu bo ta—
pa mainta bo lanta papa sodá,
pasobra ta den fòrnu b’a drumi.

Si bo bai Hulanda bini bèk,
bo ta keda semper un barku mal mará
ku ki ora ku ta por ranka bai —
ku hopi hende ma sin amigu
ni kamind’e bai — pasobra
niun kaminda bo n’ ke keda.

Anto dal man na kabes si bo ke
i grita yora: B’a kondena bo mes
ku tur studia ku b’a studia.

MA SIGUI PURBA! No desesperá
benta bo kurpa na awa. I si ta
sa mes bo n’ sa mas kiko hasi:
Dal man na obra i grita hari.

---

Martinus Arion, Frank. Ta Amor so Por: Un Korona Di Poesia Trahá Riba Un Isla  Ku No Ta Eksistí Meimei Di Hulanda Ku Kòrsou. Fundashon Konsenshi Humanista, 2004.