Frank Martinus Arion

Na mi koló, mi stèm, mi moda di yora —
Realisá ku ta aki mes m’a nanse
Anke mundu a kondenami pa strañeru —

Realisá ku tur loke m’a deseá tabata bon:
Un tiki solo, un tiki fresku, un tiki amor
I nada mas. Ami ku fo’i chikitu a komprondé
Ku amor tampoko n’ tin mas forsa ku morto

Kalke dia un hende lo realisá di ripiente
Ku no ta pleita mi ker a pleita ku mundu
Anke de bes en kuando ma halsa mi bos

SI! Nan mester realisá ku no ta pa mi mes
M’a biba — e ora ei basha bin mi morto —
E or’ei grita bisa: E tabata un di nos!

---

Martinus Arion, Frank. Ta Amor so Por: Un Korona Di Poesia Trahá Riba Un Isla  Ku No Ta Eksistí Meimei Di Hulanda Ku Kòrsou. Fundashon Konsenshi Humanista, 2004.